Egin zaitez laguntzaile eta gozatu eskaintzen dituen abantailez NOLA?

Arrow up
Arrow down
Praktikatu Praktikatu

Historia

Image

21. korrika

  • Garestik Gasteiza
  • 2019ko apirilaren 4tik 14ra
  • Leloa: Klika
ABESTIA:
Image

Goraka doa Korrika; maila indibidualetik kolektibora KLIKA egin zutenekoa.

Korrikaren 21. edizioa 2019ko apirilaren 4an hasi zen Garesen, eta, 2.560 km egin eta gero, apirilaren 14an amaitu zen Gasteizen, “KLIKA” lelopean. Omendua Jose Luis Alvarez Enparantza Txillardegi izan zen, euskara batuaren sortzaile nagusietako bat. Musika-kontuez, Mad Muasel, La Furia eta Fermin Muguruza arduratu ziren, eta “Klika” abestia sortu zuten.

Klika egitea aukera bat hartzea da, euskararen aukera hartzea, hautua egitea

Hautua da euskara ikastea, erabiltzea, inplikatzea, jauzia ematea. Klika egitea da euskaraz ahalduntzea, euskaltegietan matrikulatzea.

Klika da herritar guztien hizkuntza eskubideak bermatzeko neurriak hartzea. Konpromisoak hartzeko garaia da.

Klika garai berri bati, kulturari, gure hizkuntzari. Egin klik begiak ondo irekita. Hartu arnasa sakon, euskal inguruneari begiratu, eta klik egin bizitzeko, aske izateko, euskara aukeratzeko. Egin klik, ikimilikiliklik! AEK-k euskara du gizarte berri baten ardatz, eta mundu horretarako zu aukeratu zaitu, zugan klikaturik. Klika, etorkizunera salto egiteko. Klika Korrika.

Klik eginez iziotzen ditugu hizkuntzaren argiak, doinuak, ahogozoak; klika da euskal musika-txaranga, eta klikatuz asetzen dugu euskara-klika, euskara-egarria, euskara-gosea.

Euskarak hurrengo fasea klikatu du: akzioarena, konpromisoarena; euskara unibertsal bihurtuko dugu, eta klik eginen du denon zeruan. Euskal Herriak hartu du euskararekiko kontzientzia, sortu du euskal komunitatea. Euskararen aroan gaude; orain da unea: etorri euskarara, aktibatu, erabakiak hartu, klik egin, euskaraz egin.

21 KORRIKAren mezua

Omendua

Txillardegi da, askorentzat, gerra ondoko Euskal Herrian izan zen belaunaldien arteko etenaren protagonista nagusietakoa. Giro horretan —eta tradizioaren aurka― ernatu zen pentsamendu berriak politika, kultura, filosofia eta erlijioa zituen berezko arlo.

Txillardegik utzitako ondarea, literaturan, ikerkuntzan, irakaskuntzan, euskalgintzan, handia da; bere sasoian, KLIKA egin zien euskarari, literaturari, herriari...

Txillardegiren kezka nagusia zen aldarrikatzea herriak hizkuntza beharrezkoa duela eta Euskal Herriak euskara ezinbesteko ezaugarria duela.

Txillardegik euskaldunoi egin digun ekarpena:

Txillardegik, urte askoan, irmotasunez agertu zuen goi-mailako erabileretarako euskal hizkuntza bateratua sortzeko beharra. 1957tik, euskaltzain urgazlea zen, baina sekula ez zen iritsi euskaltzain osoa izatera, euskalari gisa aski eta sobera merezimendu zituen arren.

1964ko urrian, Euskal Idazkaritzak batzar ireki baterako deialdia egin zien Euskal Herriko idazle eta irakasleei, haien iritziak entzuteko. Urtebete geroago, hartutako erabakiak biltzen zituen txostena plazaratu zen. Hura izan zen Arantzazuko Batzarrak 1968an eraturiko txostenaren —euskara batuaren sorrera-agiritzat hartzen den txostenaren— aurrekari nagusia. Bada, lehenengo txosten haren aitzindaria eta egilea Txillardegi izan zen.

Txillardegiren Klika. 21. KORRIKArako egindako dokumentala

21. KORRIKA 2018ko azaroan aurkeztuko dugula aprobetxatuz, EUSKARA BATUAREN 50. urteurrena dela baliatuz, eta Txillardegik merezitako omenaldia behar duelakoan, 21. KORRIKAn Txillardegi omentzeko proposamena dakargu; egundoko lana egin zuelako, eta euskaldunon historian egin den gauzarik inportanteena ziur aski Txillardegiri zor diogulako. Ezin da esan hori baino gehiago. Euskararen historian, bada gauza bat oinarrizkoa, beste guztiak baino garrantzizkoagoa, eta hori estandarra sortu izana da: EUSKARA BATUA.

Euskal Herrian, JAKIN aldizkariak izugarrizko lana egiten du Txillardegiren ekarpena hedatzeko. Ikusi HEMEN

Lekukoaren ezkutuko mezua

Aurtengo mezuaren egileak, Maialen Lujanbiok, plazaratu du lekukoaren barnean iritsitako testua Gasteizko Andra Txuriaren plazan; Garestik atera eta 11 egunetara.

KLIKA! SISTEMA ERAGILEAN
21. KORRIKAn eskuz esku joan den lekukoaren barruko mezu gogoangarriak azpimarratu du euskara ez dela euskararen gauzetarako aplikazioa. Euskarak behar du herri honen Sistema Eragilean.
Hori dela eta, KORRIKA egiten dugu, lehenetik eta gerorantz. KORRIKA.
Egin, eragiteko. Eragin, eginarazteko.
Norbanakoak egin.
Herri-mugimenduek eragin.
Erakundeek eginarazi.
Egin, eragin, eginarazi.

Korrika Kulturala

EDIZIO HONETAKO ESTREINALDIAK:
GARAIKIDEAK | Dantza entzun dezagun. Aiko Taldea
ENKARGUZ | Sormenaren ibaian.Xabier Zabala eta Andoni Egaña
JULE | Kale-antzerkia. Hortzmuga Teatroa
OHOLTZA | Performance-a. Beñat Krolem
MUSUA. Pirritx, Porrotx eta Marimotots
KALAPORTU | Sarrionandiaren lurralde poetikoa

Ibilbidea

Hemen dituzue Ikastolen Elkartearekin batera 20. KORRIKArako landu ditugun unitate didaktikoak.

Hemen dituzue AEKn euskaltegietarako prestatu ditugun 21. KORRIKAren unitate didaktikoak