Euskal Herri osoko eskoletan zabaltzeko unitate didaktiko horiek eskuragarri daude webgune honetan. Ikasmaterialak adinaren arabera sailkatuta daude, Haur Hezkuntzatik Batxilergora. Hainbat berrikuntza dakarte, baina betiko helburuak: euskararen aldeko jarrera zabaldu, euskararen aldeko kontzientzia suspertu, eta erabileran eragitea; eta, nola ez, KORRIKA ezagutaraztea. Iñaki Zapirain Orereta ikastolako irakasle eta unitate didaktikoen egilearekin elkarrizketa laburra izan dugu.

Argazkian, AEK-ko Artezkaritza kide Aize Otaño, KORRIKA arduradun Ane Elordi, Orereta ikastolako irakasle eta Unitate didaktikoaren egile Iñaki Zapirain eta Ikastolen Elkarteko lehendakari Nekane Artola.

KORRIKAren azken bi edizioetan bezala, unitate didaktikoak modu digitalean argitaratu dira. Unitateok helburu dute euskararen erabilera sustatzea eta indartzea eta, noski, euskararen aldeko ekimenaren girotze-lana egitea.

Era berean, aipatzekoa da jarduerak ez direla soilik euskara arloan lantzekoak. Izan ere, hainbat irakasgaitan erabiltzeko pentsatuta daude, Gorputz Hezkuntzan, esaterako.

Unitateak adinaren arabera sailkatuta daude, eta, edizio honetan, izen berriekin datoz:

HARRO unitatea, 3-6 urte bitartekoentzat.
HERRI unitatea, 6-9 urte bitartekoentzat.
ORRO unitatea, 9-12 urte bitartekoentzat.
KORRI unitatea, ikasle nagusientzat (12-18 urte bitartekoak).

HARRO eta HERRI unitateetan, ikasgelako arbela digitalean proiektatzea proposatzen da. ORRO eta KORRI unitateetan, ordea, ikasleek ordenagailu eramangarriak erabil ditzakete webgunean sartzeko.

Gida didaktikoak irakasleei ere badaude zuzenduta. Unitate bakoitzari dagokion gida deskargatzeko aukera dago; jarduerak aurrera eramateko argibide guztiak daude bertan.

Iraupenari dagokionez, bi asteko kanpaina egitea proposatzen da. Hori bai, irakasle bakoitzaren esku geratzen da edukiak denbora luzeagoz erabili edo proposamenak laburtzea.

Prozedurari dagokionez, gauza bera: edukiak adin-tarteka banatuta egon arren eta jarduerek nolabaiteko hurrenkera bat badaukate ere, irakasle-taldearen esku geratuko da jarduera guztiak gauzatu ala ez, aukeraketa bat egingo den, beste adin-tarte baterako jardueraren bat egokitu nahi duten… Azken batean, materiala ez da zurruna eta nahieran erabil daiteke.

Edukiak eta berrikuntzak

Ispilu harrogarria. Goiatz Labandibar idazlearen ipuin batek ematen die lotura jarduerei. Ipuineko protagonistak Nora eta Harri izeneko bi ume dira, eta, edizio honetako leloari (HARRO HERRI) erreferentzia eginda, hainbat gairen inguruan hausnartuko dute ikasleek: lotsari buruz hitz egitea, harro sentitzearen garrantzia... Lur Kortak egin du ipuinaren kontaketa.

Harro, herri, korri! esku-jolasa. Harri, orri, ar jolasa aitzakia gisa hartuta, Irundik Baionara doan ibilbidea osatu beharko dute.

Artelana. Edizio honetako mihiseak, 23. KORRIKAren logoaren atzeko hondoak, euskararen eta euskal kulturako erreferentzia pila bat ditu. Ikasleek horiek identifikatu beharko dituzte, antzeko irudiak sortu eta horma-irudi handi bat eraiki.

Omenaldia jarduera. KORRIKAren omenduen inguruko lanketa. Iparraldeko lagunek azterketak euskaraz egiteko dituzten arazoez jabetzea da jardueraren helburua, eta Azterketak euskaraz kolektiboari elkartasun-gutunak bidaltzea proposatzen da. Horrekin lotuta, 23. KORRIKAren dokumentalaren inguruan zineforum bat egitea ere iradokitzen zaie ikasle helduenei.

Ozto(poz) lasterketa. KORRIKAk ibilbidean zehar gainditu behar izaten dituen oztopoei erreferentzia egiten die jarduerak. Gorputz Hezkuntzako saioetan, oztopoz beteriko zirkuitu bat gauzatzea proposatzen da bertan.

Plazara dantzara! jarduera ere topatuko dugu. Edizio honetarako Myrian Perezek sortu duen koreografia, alegia.

Korrikahoot jolasak. KORRIKAren historia hobeto ezagutzeko.

Bingo musikatua. Hainbat ediziotako kantak ezagutzeko ariketa.

Dagoeneko klasiko bihurtu diren jarduerak ere badaude: petoa, lekukoa, ibilbidea, mezua…

Esan bezala, unitate didaktikoen bilduma hemen dago eskuragarri: www.korrika.eus webgunean, hemen zehazki.

Astero zozketak egingo ditugu Korrika Laguntzaileen artean. Hurrengoa urtarrilaren 26an egingo dugu. Zorte on!

Hemen sariak:

1. ANE IZASKUN ARANBURU LEIVA (Zubieta). Laukizko Atxispe Etxean bi lagunentzako bi gau eta gosaria; Zornotzako Uxarte sagardotegian menu bat bi lagunentzat eta Lakari elikadura eta kontsumo jasangarria taldeak emandako saski bat.

2. ETXAHUN LEKUE ETXEBARRIA (Larrabetzu). Ezpeletako Choko Ona jatetxean erabiltzeko 100 euroko bonua, Angeluko Atlanthal Thalasso Sparako bi sarrera, Baionako Euskal Museoa bisitatzeko bi sarrera eta Arabako Udapa Patatak enpresak emandako produktu sorta bat.

3. ANDONI MIRENA LABAKA VICENTE (Orereta). Hernaniko Elutxeta sagardotegian bi lagunentzako menua, Albaola museoa bisitatzeko bi sarrera, Lakari elikadura eta kontsumo jasangarria taldeak emandako saski bat.

4. FITO KEREXAZU BALANTZATEGI (Gasteiz). Aramaioko Iturrieta sagardotegian bi lagunentzako menua, Santa Maria katedrala ikusteko 2 sarrera (katedrala eta dorrea) eta Izpi Soa liburua eta Arabako Udapa Patatak enpresak emandako produktu sorta bat.

5. AMAIA ORBEGOZO ZIGARAN (Azkoitia). Santa Maria katedrala ikusteko 2 sarrera (katedrala eta dorrea) eta Izpi Soa Liburua, Iraun Gasteiz entrenatze zentroan 10 saioko bonu bat (1. eta 2. nutrizio kontsulta barne) eta Lakari elikadura eta kontsumo jasangarria taldeak emandako saski bat.

Zeren zain zaude Laguntzaile izateko? Astero, zozketak egingo ditugu LAGUNTZAILEEN artean (300 sari baino gehiago), deskontuak, abantailak... eta garrantzitsuena, 15 euroren truke, KORRIKAren parte izango zara, zure laguntzarekin egingo dugulako aurrera.

                             

                                                  

    

    
   

 

   
   

 

 

 

 

 

BADON* opera postdramatikoa atzo iritsi zen Iruñera. 

Korrikak eta Berriak elkarlanean sustatu dute ikuskizuna, egunkariaren 20. urteurrenaren harira: Korrika Laguntzaileek zein Berrialagunek deskontua izan zuten sarreretan, sarrerak zozketatu ziren Berrialagunen artean...

BERRIAko zuzendari Amagoia Mujika eta Nafarroako delegazio buru Joxerra Senar ere izan ziren Gayarre Antzokian.

Irudian, Mujika eta Senar, erdian, AEKren Artezkaritza kide Xabi Gartzia eta KORRIKAko Nafarroako arduradun Asier Biurrunekin batera.

Hitzarmena

BERRIAK eta KORRIKAk lankidetza hitzarmena izenpetu zuten atzo goizean. Egunkariaren zuzendari Amagoia Mujikak eta KORRIKA arduradun Ane Elordik sinatu zuten ituna BERRIAren egoitzan. 

Euskararen aldeko ekimena berariaz jorratuko du egunkariak paperean, webgunean eta sare sozialetan.

Harrotasunez aldi hau kontatzeko! 

Astero zozketak egingo ditugu Korrika Laguntzaileen artean. Hemen sariak eta irabazleak. Zorionak!

1. JUANJO IRIGOIEN REGUEIRO (Eibar). Etxano nekazalturismoan bi lagunentzako gau bat eta gosaria; Durangoko Iruko jatetxean afari bat bi lagunentzat, Durangoko Hontza Museorako bi sarrera eta Saltus Garagardoak emandako sei aleko sorta bat.

2. CARLOS BERRIZBEITIA GANBOA (Durango). Hernaniko Iparragirre sagardotegian lau lagunentzako menua (2 menu bikoitz), Chillida Leku bisitatzeko lau sarrera, eta Zarauzko Lakari elikadura eta kontsumo jasangarria taldeak emandako saski bat.

3. KARMELE REKALDE ONIS (Iruñea). Iruñeko Herriko Tabernan asteburuko bazkari bat bi lagunentzat, Oteiza Museorako lau sarrera eta Saltus Garagardoak emandako sei aleko sorta bat.

4. EÑAUT ZARRABEITIA OKAMIKA (Galdakao). Trebiñu sagardotegian menu bat eta sagardo sorta bat, Gasteizko Jimmy Jazz aretoan lau sarrera Liher + Habi kontzerturako eta Zarauzko Lakari elikadura eta kontsumo jasangarria taldeak emandako saski bat.

5. JON ANDER ERKIAGA EGIDAZU (Zornotza). Laudioko Olympus kirol dendan erabiltzeko 50 euroko erosketa-txartela, Donostiako Aquariuma bisitatzeko bi sarrera eta Saltus Garagardoak emandako sei aleko sorta bat.

Zeren zain zaude Laguntzaile izateko? Astero, zozketak egingo ditugu LAGUNTZAILEEN artean (300 sari baino gehiago), deskontuak, abantailak... eta garrantzitsuena, 15 euroren truke, KORRIKAren parte izango zara, zure laguntzarekin egingo dugulako aurrera.

                          

                                                   

    

    
   

 

   
   

 

 

 

 

 

BADON* opera postdramatikoaren bira abian da. Hemen hurrengo emanaldiak:

2024/01/18 IRUÑEA. Gayarre Antzokia. 19:00. Sarrerak HEMEN.
2024/01/21 BAIONA. Michel Portal Antzokia. 17:00. Sarrerak 10 euroan (Korrika Laguntzaileek 8 euroan), HEMEN eta Baionako AEKn (Marengo 22) salgai.
2024/02/03 TUTERA. Fernando  Remacha Musika eskola. 18:00

BADON* zentzumenetarako gutizia da: baliabide bisualek (argia, bideoa), zuzeneko musikak (organikoa eta elektroakustikoa) eta baita mugimenduak, literaturak eta bertsoek ere osatzen dute ikuskizuna.

Atal HONETAN informazio guztia topatuko duzue.

Bi hilabete baino ez dira falta KORRIKA Irundik abiatzeko! San Juan plazan emango ditu lehendabiziko urratsak euskararen aldeko ekimenak, eta toki hori, hain zuzen, aukeratu dute Irungo AEK-ko eta Udaleko ordezkariek datozen bi hilabeteotan egingo den Korrika Kulturalaren berri emateko.

Korrika egun batera ez mugatzeko, eta Irun ekitaldiz, kulturaz eta euskaraz betetzeko helburuz, "Herri Harro baten agenda, harro eta euskalduna" prestatu dute, Irundik eta irundarrentzat.

Egitaraua BADON* opera posdramatikoarekin hasi zen, atzo (urtarrilak 13). Datozen ekitaldiak:

• Urtarrilaren 20an, Landetxako KORRIKA eguna: altxorraren bila, trikipoteoa, bertso bazkari musikatua, skate tailerra eta kantu jira. Eguerdiko 12:00etatik aurrera.
• Otsailaren 18an, Hausnar dezagun mIgrazioaz eta hizkuntzaz emanaldia, Irungo Harrera Sarearekin elkarlanean, Amaia Kultur Zentroan. Aurreraxeago emango ditugu zehaztasun gehiago.
• Otsailaren 24an, Larreaundiko KORRIKA eguna. Auzoan egun osoko egitaraua prestatzen ari dira, 11:45ean txupinazoarekin hasi eta iluntzean kontzertu ibiltari batekin amaituko dena. Tartean, haurrentzako tailerrak, jolasak, musika, azoka... Adi!
• Martxoaren 2an, Santiagoko KORRIKA eguna. Bertan ere hamaika ikuskizun eta joko egongo dira.

Argazkian, Irungo KORRIKAko koordinatzaile Maddi Sanz, Kultura ordezkari Nuria Alzaga eta AEK-ko kide Mattin Sorzabalbere.
(Bidasoako HItzaren argazkia. Eskerrik asko!).

Irunen ere HARRO HERRI!

Mutualiak bere hizkuntza-politikan euskararen erabilera sustatzeko konpromisoa berretsi du, eta hori dela eta, lankidetza-hitzarmena sinatu du AEK-KORRIKArekin.

Mutualiak hamarkada bat baino gehiago darama EAEko hiru lurralde historikoetan zerbitzua euskaraz bermatzen, eta langileen artean euskara erabilera sustatzen. Jarduera-esparruetan ekintzen bidez euskararen inguruko informazioa, prestakuntza, sentsibilizazioa, kontzientziazioa eta euskara bera langileen artean sustatzen jarraitzeko, AEK-KORRIKA izango du bidelagun.

Helburu horiek lortzeko, 21. KORRIKAn e-Korrikako ipuinak liburua kaleratu zuen Mutualiak, eta 22.enean, e-Korrikaren 3. edizioa burutu zuten. Aurten, Korrikaren 23. edizioarekin batera, e-Korrikaren 4.ena egingo dute Mutualian.

Zer da e-Korrika?
Emailak hartuko du lekukoaren postua, eta eskuz eskuz beharrean, ordenagailuz ordenagailu, postontziz postontzi bidaiatuko du Mutualiako langileen artean. Gauzak horrela, e-Korrikak ibilbide birtuala egingo du Mutualiako egoitzetatik. Ziurrenik, azken edizioan bezala, mapa bat argitaratuko dute mezuek egindako ziber-ibilbidearekin.

Irudian, Mutualiako presidente Urtza Errazti eta gerente Ignacio Lekunberri, KORRIKA arduradun Ane Elordi eta Tito Serranorekin.

23. KORRIKAren ibilbidea. Prentsa oharra.

Recorrido de 23ª KORRIKA. Nota de prensa.

23. KORRIKA. Itineraire.Communiqué de presse.

23. KORRIKAren ibilbidea ezagutarazi du, gaur, AEK-k. Edizio honetan, euskararen aldeko ekimen erraldoia Irundik aterako da martxoaren 14an, eta, hamaika egunez Euskal Herri osoa igaro ostean, Baionan amaituko da, martxoaren 24an. Ibilbidearen xehetasunak KORRIKA aplikazioan azaldu dira esklusiban, eta bertan zein webgunean kontsulta daiteke nondik igaroko den 2.700 kilometroko lasterketa. Kilometroak erreserbatzeko aukera, berriz, otsailaren 1ean zabalduko da.

Ohiturari jarraikiz, aurreko KORRIKA amaitu zen herrialde berean hasiko da oraingoa: Gipuzkoan, hain zuzen ere. Aurkezpen-egunean iragarri bezala, Irunek emango dio hasiera, eta bertako San Juan plazatik abiatuko da, arratsaldeko lauretan. Lehendabiziko egunean, Gipuzkoa eta Lapurdi artean ibiliko da KORRIKA, eta azken lurralde horretan arratsaldeko bostak pasatxo sartuko da, Hendaiatik. Hala, Lapurdin emango du lehendabiziko eguna, eta bertan egongo da ordu txikiak arte, Nafarroa Beherean murgildu arte, Donoztiritik. Gau berean, Zuberoara igaroko da eta, bertako hiriburua zeharkatu ondoren, berriro itzuliko da Nafarroa Beherera.

Martxoaren 15ean, ostirala, Nafarroara egingo du jauzi KORRIKAk Azkarate herritik, eta bertan emango du asteburu osoa. Bortzirietatik hasita, Pirinioak izango ditu helburu, eta handik hegoaldera egingo du, Iruñera arratsaldeko bostak eta laurdenetan heltzeko. Hiriburua utzita, Erriberako norabidea hartuko du; gero, iparralderantz egin eta, Lodosa zein Lizarra atzean utzita, Arabako lurretan sartuko da Mendialdetik.

Martxoaren 18an, beraz, Araba aldez alde zeharkatuko du, eta Gasteiza arratsaldeko zazpi eta erdietan ailegatuko da. Hala, gaueko hamarretan, Arabako hiriburuko alde zaharraren txanda izango da KORRIKAri harrera egin eta jarraipena emateko. Ondoren, Lautadara abiatuko da, goizeko ordu bietan bere herriburura, Agurainera, helduta. Ordurako, martxoak 19, asteartea, izango da, eta egun horretako egunsentiarekin batera utziko du KORRIKAk Araba, Nafarroako Sakanan sartzeko, Ziorditik; Altsasu, Bakaiku, Etxarri Aranatz, Irurtzun... eskuz esku ibiliko da lekukoa, eta Gipuzkoa izango da hurrengo herrialdea.

Leitza eta Goizueta atzean utzirik —azken herri horretatik KORRIKA ez zen igaroa 2009tik—, Hernanitik sartuko dira korrikalariak 20:20 aldera. Hortaz, aurreikuspenek kale egin ezean, martxoaren 20ko asteazkena izango da lasterketa Gipuzkoako kostaldera heltzerako; gaueko hamabiak aldera iritsiko da itsasertzera: ordurako, Oriora helduta egongo da, ondoren Zarautz eta Zumaiara jarraitzeko asmoz.

Tipi-tapa! Atsedenik hartu gabe, Debagoiena izango da hurrengo helmuga, handik Debabarrenera jarraitzeko: Bergara, Elgeta, Eibar, Elgoibar... Goiz osoa Gipuzkoan eman eta gero, Mutrikuk esango dio “hurrena arte” egun eta lurralde horietan, 14:11n.

Bizkaiko kostaldetik asko aldendu gabe ibiliko da ondoren: Ondarroa, Lekeitio, Elantxobe... Gernikan 23:04an agertu arte. Itsasaldetik berriro ere gehiegi urrutiratu barik, martxoak 21, osteguna, izango da Bermeora heldutakoan, gaueko 01:31n. Egun horretan ailegatuko, bestalde, Bilbora, ia bostetan puntuan: 16:59an. Ondoren, Ezkerraldea zeharkatu du, eta, gerora, Meatzalde eskualderantz joko du, non 23:15 eta 02:00 bitarte ibiliko den.

Hurrengo eguna ere, martxoak 22, Bizkaian emango du KORRIKAk, nahiz eta une batez Araban sartuko den, Artziniega eta Aiaraldea bisitatzeko. Otxandio izango da Bizkaiko azken herria, dagoeneko, martxoak 23, larunbatean, 00:12an. Asteburua helduta, iparralderantz joko du beste behin, Goierritik igarota, azkenik, Donostiara heltzeko 19:22an.

23. KORRIKAren azken orduak Gipuzkoatik Lapurdirako bidean izango dira, Nafarroara zertxobait sartuta: Oiartzun, Lesaka, Bera, Sara, Senpere, Biarritz, Angelu... Igandeko gau eta goizean zeharkatuta, Baionarat iritsiko da azkenik, eguerdian, 12:30ak aldera. Mezua irakurriko dute ondoren, eta amaierako jai handia 13:30etik aitzina dago aurreikusia.

KORRIKA aplikazioa

Aurtengo nobedadeen artean, KORRIKA app-a da aipagarriena; aurreko ediziotik hona, guztiz itxuraldatuta dator: hainbat atal berri ditu; adibidez, Korrika Laguntzaile txartela txertatuta dakar, eta aplikazioaren baitan eramateko aukera eskaintzen du, mugikorrean bertan,. Horrez gain, astero Korrika Laguntzaileen artean egiten diren zozketak (eta, noski, irabazleak) erakusten dira bertan.

Ibilbideari lotuta, arestian aipatu bezala, aplikazioak beste inon baino lehenago ikusteko aukera eskaintzen du, eta, hori gutxi ez balitz bezala, KORRIKA zuzenean jarraitzeko aukera ere emango du: furgonetaren geolokalizazioaren bidez, korrikalariek jakingo dute KORRIKA aurrerapenez ala atzerapenez datorren; hots, aplikazioaren erabiltzaileek une oro egiaztatu ahal izango dute nondik dabilen lasterketa. Horri lotuta, interesgarria da jakitea bilatzaile aurreratua duela: erraz ikusi ahal izango da non dagoen edozein herri, eskualde edo/eta kilometro.

Amaitzeko, aplikazioak aukera ematen du KORRIKAren inguruko jakinarazpen eta eta jakingarri garrantzitsuenen berri jasotzeko —orain arteko gertaerak, aurkezpena, abestia, ibilbidea...—. IOS zein Android bertsioentzat dago eskuragarri, eta lasterketa bitartean gerta litekeen edozein gorabeherari buruz ere informatuko du.

Astero zozketak egingo ditugu Korrika Laguntzaileen artean. Hemen sariak eta irabazleak. Zorionak!

1. BEGOÑA RODRIGUEZ AZKORRA (Bermeo). Etxebarriko Antsotegi hotelean bi lagunentzako gau bat, afaria eta gosaria; Gasteizko Principal Antzokirako neguko abonu bat bikoitz eta Saltus Garagardoak emandako sei aleko sorta bat.

2. MAITANE IZA ATXUTXA (Dima). Bilboko Kalderapeko jatetxean bazkari bat bi lagunentzat, Mallabiko Mañeko Azpi Hotelak emandako saski bat, Bilbao Basket ikusteko (urtarrilaren 27an) 3 sarrera bikoitz eta Gatikako Butroi upategiak emandako ardo kutxa bat.

3. LOREA UGARTE LASKURAIN (Gasteiz). Zuiako Atabaka jatetxean bazkari bat bi pertsonarentzat, Donostiako Aquariuma bisitatzeko bi sarrera, Gasteizko Principal Antzokirako neguko abonu bat bikoitz, eta Saltus Garagardoak emandako sei aleko sorta bat.

4. XABI BALLARAN (Erratzu). Iruñeko Geltoki jatetxean lau lagunentzako afari bat produktoreekin (afari edo bazkari normal batengatik ere trukatu ahalko da), Oteiza Museorako lau sarrera eta Mallabiko Mañeko Azpi hotelak emandako saski bat.

5. KARLOS KOROSO ARRIAGA (Gasteiz). Gasteizko Principal Antzokirako neguko abonu bat bikoitz, Elgoibarko Iriondo Kirolak dendarako 50 euroko erosketa-txartela, Donostiako Aquariuma bisitatzeko bi sarrera eta Saltus Garagardoak emandako sei aleko sorta bat.

Zeren zain zaude Laguntzaile izateko? Astero, zozketak egingo ditugu LAGUNTZAILEEN artean (300 sari baino gehiago), deskontuak, abantailak... eta garrantzitsuena, 15 euroren truke, KORRIKAren parte izango zara, zure laguntzarekin egingo dugulako aurrera.